Dibunadeg Gouelioù mor 2024 : ar Rannvro o sturiañ

15 Gouere 2024

3 vunut evit lenn

An dibunadeg war vor etre Brest ha Douarnenez a vo dalc’het d’an 18 a viz Gouere ! Un nebeud titouroù pleustrek a gavoc’h amañ.

A-benn un nebeud deizioù e vo dalc’het ar Gouelioù mor, hag ar Prezidant Loïg Chesnais-Girard ha Loïc Hénaff, kuzulier-rannvro karget eus an teuliad, o deus kinniget asambles temoù brasañ an Dibunadeg war vor a lakay kazi ur milier gouelerioù hengounel da vageal etre Brest ha Douarnenez. Ar Rannvro a vo war evezh bepred e-keñver surentez hag aezamant an holl, war vor koulz ha war an douar.

Eurioù ha perzhidi : 1 000 bag ha 4 000 martolod

IMeur a gant goueler hengounel, enskrivet evit Gouel ar Bigi e Brest hag e Douarnenez, a loc’ho eus Brest d’an 18 a viz Gouere da 7e30 beure evit erruout e Douarnenez etre 4e ha 5e30 d’abardaez, diouzh an amzer a vo. Ambrouget e vint gant un toullad mat a vigi all hag a ranko holl heuliañ pizh an droiad termenet ha doujañ an takadoù gwarezet ma vo difennet mont.

Un droiad a-hed lec’hiennoù dibar ha gwarezet

Mulgul Brest, Beg ar Garreg Hir ha Beg Penn Hir, Beg ar C’havr… Troiad an dibunadeg a lakay tremen en donvor e kostezioù lec’hiennoù mor eus ar re dalvoudusañ e Breizh, hag un nebeud anezho zo gwarezet strizh (takadoù Natura 2000) evit o ekoreizhiad ral ha bresk. Da-heul ur studiadenn war an endro he deus divizet ar Rannvro kemmañ un tamm troiad an Dibunadeg, kuit da zirenkañ ar spesadoù a zo o vevañ en takadoù bresk-se.

50 km « tribunelloù » digor d’an oabl war ar wenodenn-aod

Pedet eo an dud da vont da sellet ouzh an Dibunadeg, un arvest dibar ken eo, etre 8e beure ha 5e d’abardaez, gant ma vo doujet ganto d’ar c’hemennoù evit gallout mont d’ar sellboentoù, ha chom war ar BH 34. Evit merañ mat ar c’hementad tud a vo o vont hag o tont e vo staliet panelloù war an hentoù-departamant hag er c’humunioù da ziskouez an hent, d’an holl da vont aes betek ar 5 « tribunell » naturel : Mulgul Brest ; Beg ar Gouin, ar Garreg Hir ha Penn Hir ; Beg ar C’havr ; ar C’hab, e tu Beuzeg-ar-C’hab hag e tu Plonevez-Porzhe.

Tribunell 1 : Mulgul Brest
Tribunell 2 : Beg ar Gouin, Ar Garreg Hir – Beg Penn Hir
Tribunell 3 : Beg ar C’havr
Tribunell 4 ha 5 : Ar C’hab – Beg Trefeunteg
Kartenn hollek an holl dribunelloù
Troiad war vor

Implijet e vo ar c’hirri-boutin BreizhGo adalek Brest ha Kemper

Ar Rannvro a ginnigo muioc’h a girri-boutin BreizhGo adalek Brest ha Kemper (linennoù 34. 37. 51 & 52) kuit da gaout stankadegoù kirri. Ur wech e Kameled ha Kraozon e vo kaset an dud tostoc’h ouzh an « tribunelloù » gant bulzunoù BreizhGo digoust. Ar weladennerien a c’hallo ivez mont war droad pe war velo gant ar wenodenn adalek ar parklec’hioù kempennet