Duete Meillouretë arolée de mè : qhi qi sera la perchaine skipouere Bretagne CMB Océane ?
6 January 2022
4 minutes de lecture
neu jieunes mâraines sont a s’entr-manjer le pai pour étr la perchaine skipouere Bretagne-CMB Océane. Le nom de la siene chouézie sera bani le 17 de delère
Ao pergrame de la dusse semene d’elouterie-la : entercaozeries a l’egrun, prizaijes tecniqes e du corp pés naviaije den le Figaro Bénéteau 3, tout le cai-la o eune couée de qenessants a les prizer (deden la couée-la n-i a des erperzentants de l’Assenterie Françaeze de Batiaos a cordaijes, meins n-i a etout des navious erqenûs).
De cai q’i vieulent les couéfes-la don ? Gâgner lou pllace a l’about e prindr aprés Elodie Bonafous qi fut la permiere skipouere Bretagne CMB Océane. De méme, il aront un batè, des elijes pour étr net en biao pour concourer a la concourerie de France Haote-Penâ d’arolée de mè e pés rentrer ao Rassembl Finistere, q’ét la vra garantie de sieudr eune formézon de metier seriouze e d’aprindr o les meillous navious françaez.
Dede ‘la, traez en-méle yelles seront ertinzes eyou qe sera chouézi l’enlaorierée du projit-la, projit q’a të fèt pour les couéfes e ren qe pour les couéfes.
L’enlaorierée-la rejoinra don Tom Laperche e Gaston Morvan den la Duete meillouretë d’arolée de mè.
Les jieunes couéfes eloutées :
- Camille BERTEL
- Chloé LE BARS
- Margot RIOU
Cant qe la Duete Meillouretë d’arolée de mè montere comben q’ole ét capabl su la Transat Jacques Vabre !
En images
Pour les especialists, la qhelée de la Transat Jacques Vabre en duette n’avaet pâs a-revaer ren q’o la cheminerie chouézie ben sûr meins ben pus fôt o les siens qi concouraent a l’arolée-la. En-méle, onze marins s’entr-partaijent de cai q’ét yeune des caozes permieres pourqhi q’i sont la : les garcs-la fute terouës tertout o le chalonje Espi de la Duete Meillouretë d’arolée de mè, minze ao roule en 1993 e aïdée depés 2008 par la Rejion Bertègn.
Den le reng « Ultime » Franck Cammas (Maxi Edmond de Rothschild) fut a mener durant eune couplée de jous. François Gabart e Tom Laperche (q’ét mézë skipouer de Bretagne-CMB Performance) fute eune saprée duette su SVR-Lazartigue. Armel Le Cléac’h aprouvit son Banque Populaire XI qi taet frés fèt, tant q’a Anthony Marchad e Thomas Rouxel, il ont të chouézi par Yves Le Blévec (Actuel Ultim 3) e Thomas Coville (Sodebo Ultim 3) pour tarvâiller de domë yeûs pour le grand rend’ous de l’anée-li. En Imoca, Sébastien Simon e Yann Eliès (Arkea-Paprec) parai come Nicolas Troussel e Sébastien Josse (Corum L’Epargne) fute un coupl de duettes orinées a 100% des Duetes Meillouretë tant q’ao Loïs Berrehar, i taet li le co-skipouer de Fabrice Amedeo (Nexans-ARt e Fenêtres).
O si tant de monde a coure den la pus dusse des arolées de mè en duette, vaici core ben la prouve qe, depés q’o fut minze ao roule n-i a 24 anées de temp d’ela ao Rassembl Finistere d’arolée de mè de Port-La-Forêt, la mayenerie de metier de terouâille e de formézon-la ebluçit bel e ben de navious qi sont pâssës champions dedepés !
Partager :
