Flleulometr : la Rejion banit ene afutia pour luter contr la flleulerie sexist e sexuale
15 December 2022
2 minutes de lecture
La journée enternaçionale pour l’abolissement de la flleulerie su les fomes ‘la q’ét l’arivâ de conter d’ene fénacion de societë qe j’ons tertoute e tertout a-revaer su ‘la. Depés puzieurs anées, la Rejion Bertègn fèt le pus e le mieûs pour qe les fomes e les omes araent les mémes drets den tout le cai q’o mene. Aprés qe d’avair bani en 2020 son ouvraije su les chifrs les pus conseqents de l’ajeu fome-ome, la Rejion perzente, pour la journée du 25 de novembr, un flleulometr.
Afutia pour mezurer, alerter e prizer de son propr les domaijes ao dret, l’afutia-la a deja të bani e aféçonë pour tout le terrouer naciona. ‘la chomaet a fére de le rabiener pour la Bertègn, o les limerots d’acoute e d’acouillance des côrporances q’ont a-revaer d’o ‘la en pus, yelles par departement parème.
L’afutia d’agegnement-la, qi s’orine su l’assent, a devocion d’étr pour tertoute e tertout. Aprés qe d’avair të evâillë den les licës, les haotes-ecoles, les ôtieûs de formézon e les instiqhucions e consorteries bertones avant le 25 de novembr, il ét mézë su papier. Tertout peuvent le demander a la Rejion ([email protected]).
L’assent de cai q’c’ét ?
Assenti ‘la q’ét dire cllerement, o toute sa rézon e sa libertë, q’en ét d’agrë a un moment pour ene afére percize. Chaqhun.e ét en dret de se dedire a son lonlaizi e pour ses rézons a li, sans q’il araet de terouer des debllâmes ou d’étr cojë.
Des chifrs core ben tabutants
En Bertègn, parai come âillou, la flleulerie de coupl a fèt un fameûz cru, permier durant les pâssées de serraije. Aloure qe la societë, pus enghimentée q’ole ét, ét etout pus fôt en méme d’acouter : aler pllaindre depés céz sai, depés l’opitâ, depés céz ene amie, mézë n-i a mayen. Vére meins dame, ‘la n’empôze pouint qe le « Chifr nair », li de la flleulerie, entr siens de jiens, det core y’étr decllenchë.
Deja en 2000, l’encerche nacionale su la flleulerie su la fomes en France (ENVEFF) amontraet ben qe les jieunes couéfes entr 20 e 24 ans d’âje dizaent pus reglèment q’il avaent gobë de la flleulerie den lou coupl (15 du cent su les doze maez d’avant) en-vû toutes les fomes (10 du cent). En 2021, le tchatte « Comment on s’aime » perpôzë par la consorterie En avant toute(s) amontraet qe bétôt toutes les pus de 3000 entr-devizeries sans nom e pour de ren fute menées o des fomes qe la plleuralitë de yelles avaent entr 18 e 24 ans d’âje, o 15 du cent qi taent minouresses en-méle d’yelles. La plleuralitë des fomes-la contaent de flleulerie den lous coupls
Des engaijements su le long du temp
- Depés 2020, la Rejion a levë un coupl de souétons contr la flleulerie sexist e sexuale ao tarvâil :
- Yun d’acoute e d’enghimenterie pour aïder és siens fortunës
- Yun qi se chevi des aféres, se pare du designalement, garanti e aïde ao sien ou a la siene fortunée
Des engaijements su le long du temp
En pus d’ela, la Rejion a demandë qe sejent pus clleres les menieres d’aprendr pour perveni de la flleulerie den les formézons saniteres e sociales ; ole a donë la main pour qe n-i araet ene politiqe rejionale contr l’haneqinerie e la flleulerie sexist e sexuale den le haot-ensegnement e l’encercherie e s’ét engaijée a mieûs agegner les elezû.e.s du Consail rejiona contr les domaijes a la dignetë des fomes.
Partager :
